Rótarý
er alþjóðleg hreyfing fólks úr viðskipta- og atvinnulífi og opinberri þjónustu
sem stendur fyrir mannúðar- og menningarstarfi, stuðlar að sem bestu siðgæði í
öllum starfsgreinum og hvetur til góðvildar og friðar í heiminum. Hreyfingin
starfar í meira en 200 löndum í öllum heimsálfum. Á Íslandi eru klúbbarnir 32
og félagar 1173.
Eitt af
flaggskipum Rótarýhreyfingarinnar er Rótarýsjóðurinn (e. Rotary Foundation)
stofnaður árið 1928. Hlutverk
sjóðsins er að fjármagna þau verkefni sem hreyfingin vinnur að í þeirri
viðleitni sinni að skapa betri og friðsamari heim, með því að taka þátt í
verkefni er tengjast öflun drykkjarvatns og hreinlætis, bættri
heilsu, stuðningi við grunnmenntun og baráttu gegn fátækt. Sjóðurinn er einn öflugasti
hjálparsjóður heims þar sem nánast hver króna eða dollari sem gefinn er til
sjóðsins rennur beint til þeirra verkefna sem honum er ætlað að sinna.
Stærsta
einstaka verkefni Rótarýsjóðsins er svonefnt PolioPlus verkefni sem hófst 1985
þar sem stefnt er að útrýmingu lömunarveiki í heiminum. Rótarýhreyfingin með
stuðningi Bill og Melindu Gates, hefur leitt þetta verkefni og unnið að því í
nánu samstarfi við Rótarýklúbba og stjórnvöld á viðkomandi svæðum svo og
Alþjóðaheilbrigðisstofnunina WHO. Fyrir hvern dollara sem rótarý leggur til
PolioPlus veitir sjóður Bill og Melindu Gates tvo til sjóðsins. Þetta sýnir þeirra
mikla traust til Rótarýsjóðsins.
Þegar framtakið
hófst dóu þúsundir barna víða um heim af lömunarveiki og enn fleiri urði lömuð
fyrir lífstíð. En með verkefninu hafði lömunarveiki verið að mestu útrýmt eða
um 99,9%. Nú eru blikur á lofti og meðan eitt tilfelli greinist er hætta á
ferðum. Gleðitíðindin eru þó sú að það er komið nýtt bóluefni sem farið er að
nota.
Jennifer Jones,
forseti Rótarýhreyfingarinnar, tilkynnti á tónlistarhátíðinni Global Citizen
Festival í New York í september sl., að Rotary International hefði ákveðið að
leggja 150 milljónir bandaríkjadala til viðbótar í baráttuna við að uppræta
lömunarveiki í heiminum.
Hver sem er
getur lagt átakinu lið með því að fara inn á rotary1360.is eða beint á
endpolio.org.
Það er alltaf
eitthvað um að vera hjá Rótarýhreyfingunni.
Þann 13.-18.
september sl., bauð Rótarý á Íslandi, til alþjóðlegrar
ráðstefnu, Rotary Action Summit. Þetta var í fyrsta sinn sem viðlíka ráðstefna
er haldin af Rótarý hér á landi og var hún líka sérstaklega merkileg þar sem
Jennifer Jones heimsforseti var viðstödd. Þetta er í fyrsta sinn í 100 ára sögu
Rótarý sem kona er forseti. Þarna komu saman 400 rótarýfélagar víða að úr
heiminum.
Í himnesku veðri þann 15.
september tók Rótarýklúbbur Mosfellssveitar á móti rúmlega 40 þessara erlendu gesta
í trjálundi rótarýklúbbsins við Skarhólabraut. Þar fékk hver og einn þeirra að
gróðursetja tré. Það var sannarlega gaman að horfa á hópinn stoltan gróðursetja
sitt tré, mynda það með sér og svæðinu í kring þannig að næst þegar þau kæmu
til Íslands gætu þau leitað tréð uppi. Farið var síðan með hópinn að Reykjum
þar sem þeim var sögð saga heitavatnsins sem vakti mikla athygli.
Rótarýklúbbur Mosfellssveitar fékk
þessa landspildu við Skarhólabraut til afnota til trjáræktar fyrir 30 árum en
þá var spildan aðeins móar og melar. Í dag er þarna skógivaxinn vin með borðum
og bekkjum og hefur skógurinn verið opinn almenningi frá árinu 2013. Fyrsti fundur hvers
starfsárs klúbbsins er haldinn í trjálundinum þar sem félagar og fjölskyldur
þeirra gleðjast saman.
Fjórprófið svokallaða er eins
konar boðorð rótarýfélaga og hljóðar þannig: Er það satt og rétt? Er það
drengilegt? Eykur það velvild og vinarhug? Er það öllum til góðs?
Það er gefandi að vera í rótarý
og það er líka gaman. Þeir sem áhuga hafa á að kynna sér hreyfinguna eða vilja
gerast meðlimir geta haft samband við undirritaða margretgudjons@simnet.is
Margrét Guðjónsdóttir forseti Rótarýklúbbs
Mosfellssveitar.
Birt í Mosfellingi 27.10.2022
